Sulianut nukissiuutinik ataavartunik, nukissiuutinik pitsanngorsaanermik silallu pissusianut tunngasunik ineriartortitsiviusunut maleruagassat (VEK-mut aningaasaliissutit)

Naliginnaasumik paasissutissiineq 

Aningaasaliissuteqartarnermi nukissiuutinik ataavartunik atuinerup annertusineqarnissaa, nukissiuutinik pitsanngorsaanerup siuarsarneqarnissaa, gassinik silaannarmik kissakkiartortitsisartunik aniatitsinermik annikillisaanerup siuarsarneqarnissaa aammalu silap pissusianut naleqqussaanissaq, kiisalu silap pissusiata allannguutaasa inuiaqatigiinnut kalaallinut sunniutaanik paasisimasaqarnerup annertusarneqarnissaa pingaarnertut siunertarineqarpoq.

2016-imut aningaasanut inatsimmi siunertaasoq annertunerusumik nassuiarneqarpoq, imaapporlu:
  • Nukissiorfiit tungaasigut assersuutigalugu brintimit, geotermikimit, anorimit, seqinermit nukissamik ataavartumik ilisimasanik periarfissanillu pilersitsineq
  • Nukissamik ataavartumik aallarniisoqarnissaanut aporfiusinnaasunik annikillisaanissaq
  • Silaannaap allanngornerata pinngortitamut inuiaqatigiinnullu kinguneqartitsinera pillugu ilisimasat annertusineqarnissaat
  • Silaannaap allannguutaanut nalimmassaanissamut periusissanik ineriartortitsineq
  • Gassinik kissattoorutinik annikillisaanissap silaannaallu allannguutaanut nalimmassaanissap tungaasigut suliniutinik aallartitsinissaq
  • Paasissutissaliorneq paasissutissiinerlu kiisalu susassaqarfigisatigut ilisimasanik avitseqatigiinneq
  • Nukissiornermi nukissamillu atuinermi nukissiuutinik pitsanngorsaaneq pillugu ilisimasanik nutaanik pilersitsinissaq

Anguniakkat
Innuttaasut, suliffeqarfiit, sullissiviit, peqatigiiffiit, kommunit il.il.

Suliassat pilersaarutaasut
Assersuutigalugu suliassanut imaattunut qinnuteqartoqarsinnaavoq:
  • nukissiuutini ataavartuni, nukissiuutinik pitsanngorsaanermi, silap pissusiata allannguutaani aamma silap pissusianut naleqqussarnermi ilisimasanik nukittortitsinissamut
  • nukissiuutinik ataavartunik nukissiuutinillu pitsanngorsaanernik siuarsaaniarluni sulianut atortussaqarneq. Tassalu sulianut nukissiuutinik ataavartunik nukissiuutinillu pitsanngorsaanermik Kalaallit Nunaanni inuiaqatigiinnut siaruartitsinerunissamik kinguneqartussanut
  • suliat qanoq ingerlasinnaanerinik takutitsisunut, aammalu sulialinnut allanut agguaassinissaq siunertaralugu ilisimasanik tulleriiaaraluni katersuiffiusunut
  • nukissiuutinik ataavartunik pilersuinermik, nukissiuutinik pitsanngorsaanernik, silap pissusiata allannguutaanik aamma silap pissusaanut naleqqussaanernik ingerlatitseqqiffiusunut

Piumasaqaatit 

Nalunaarusiortarneq suliamullu naatsorsuutit
Suliap naammassinerani nalunaarusiussaasi suliamullu naatsorsuusiussallusi, taakkunungalu naatsorsuutinut ilaliussat attuumassutillit ilaassapput. Ukiut arlalinni suliaqarnermi ukiumoortumik killiffiit pillugit nalunaarusiortoqassaaq, suliami ukiumoortumik naatsorsuutinik ilaqartinneqartumik.

Malugiuk
Nalunaarusiornermi immersugassaq immikkut ittoq atorneqassammat.

Nalunaarusiaq suliamullu naatsorsuutit ukiumi tapiiffiusumi kingusinnerpaamik 31. december nassiunneqassammata. Aningaasartuutit suliamut missingersuutinut ilaatinneqartut tamarmik uppernarsaaserneqassapput. Nalunaarusiaq suliamullu naatsorsuutit akuerineqariarpata, tapiissutissat erngerlutik akilerneqassapput.

Qinnuteqarneq 

Suliassamut VEK-mut aningaasaliissutinit tapiiffigineqarsinnaasutut ilimanaatilinnik isumassarsisimagussi, suliap ingerlanerani siusissukkut Pinngortitamut, Avatangiisinut Inatsisinillu Atuutsitsinermut Naalakkersuisoqarfik attaveqarfigeqqullugu kajumissaarneqarpusi. Naalakkersuisoqarfimmi sulisut qinnuteqarnermut atorsinnaasassinnik pitsaasunik siunnersorsinnaavaasi suleqatigisinnaallusilu.

Aningaasaliissutinik qinnuteqarnermi qinnuteqarnermut immersugassaq immikkut ittoq immersussavarsi.

Qinnuteqarnissamut atortussat, taakkununngalu qinnuteqarnermut immersugassaq nalunaarusiornermilu immersugassaq ilanngullugit piniarsinnaavasi, uunga mail-erlusi, sianerlusi allallusiluunniit:

Silap Pissusianut, Nukissiuuteqarnermut, Pinngortitamut Inatsisinillu Atuutsitsinermut Immikkoortortaqarfik
Pinngortitamut, Avatangiisinut Inatsisinillu Atuutsitsinermut Naalakkersuisoqarfik
Postboks 1614
3900 Nuuk
E-mail: paian@nanoq.gl
Tlf: 34 50 00 (sianertunik nuussisarfik)

Saaffiginnissutit nalunaaqutserneqassapput: ”VEK-mut aningaasaliissutit”.

Ingerlatseriaaseq 

Suliassanik suliaqarneq
Tapiissutissat Pinngortitamut, Avatangiisinut Inatsisinillu Atuutsitsinermut Naalakkersuisoqarfimmi Silap Pissusianut, Nukissiuuteqarnermut, Pinngortitamut Inatsisinillu Atuutsitsinermut Immikkoortortaqarfimmit aqunneqarput.
Naalakkersuisoqarfiup qinnuteqaatit tiguneqartut avataanit suleqataasunut naliliiffigisassanngorlugit nassiussinnaammagit piareersimaffigissavarsi.

Suliassinnut tapiiffigineqarnissarsi aalajangiukkussiuk, makku pingaartissavavut:
  • Suliap aningaasaliissutini siunertaasumut naammassinninnissaa
  • Iluatsitsinissamut tunngaviusut piviusorsiortuunissaat, tassalu naatsorsuutigisassi angusinnaanissaasa ilimanaateqarnissaa
  • Suliat, piffissamut pilersaarutit missingersuutillu pitsaasumik ataqatigiinnissaat
  • Aningaasaliissutit suliami siunertaasunut, qinnuteqartup ingerlatsinermut aningaasartuutaasa nalinginnaasut iluanniittunut aalajangersimasumik atorneqarnissaat. Ingerlatsinermut aningaasartuutinut, suliamut toqqaannartumik attuumassuteqanngitsunut tapiisoqartanngilaq
  • Suliap Naalakkersuisut silap pissusianut nukissiuuteqarnermullu politikkikkut anguniagaannut allanut naleqqunnissaa
  • Suliap Kalaallit Nunaanni ingerlanneqarnissaa. Taamaallaat pisuni immikkut ittuni sulianut, nunani allani ingerlanneqartunut tapiisoqartarpoq
  • Suliami angusat misilittakkallu allanut ingerlateqqinneqarnissaat
  • Aningaasassarititaasut ikinnerpaamik 50 %-iisa aningaasaleeqataaffigineqarsimanissaat. Tunngaviusumik aningaasaliissutinit suliamut aningaasartuutit tamarmiusut annerpaamik 50 %-iinut tapiisoqartarpoq. Nammineerluni aningaasaliissutit saniatigut aningaasaleeqataassutit ilaatigut nunani allani suleqatinit, inuussutissarsiutinik ingerlataqartunit, sullissivinnit aningaasaateqarfinnillu allanit pissarsiarineqarsinnaapput. Nammineerluni piumassutsimik suliaqarnermut uppernarsaatip nalinga aningaasaleeqataassutitut isigineqarsinnaavoq. Suliat 50 %-it inorlugit aningaasaleeqataaffigineqartut aatsaat pissutsit immikkut ittut atuuppata tapiiffigineqarsinnaapput.
  • Suliffeqarfiit qinnuteqartut imaluunniit suleqataasut Kalaallit Nunaanni Inuussutissarsiortut Nalunaarsorsimaffiannut (GER) www.ger.gl nalunaarsorsimappata
  • Qinnuteqartup suliamut misilittagai. Qinnuteqartoq sulianik ingerlatsinissamut annikitsuinnarmik misilittagaqarpat, pilersaarusiornerup nalaani naapertuuttumik siunnersorteqarnerup isumagineqarsimanissaa pingaartinneqassaaq
  • Qinnuteqartup aningaasartuuteqannginnermini akuerineqarsimanissaa
  • Suliani ukiuni arlalinni ingerlanneqartuni suliat missingersuutillu ersarissumik ukiunut agguarneqarsimanissaat
  • Suliani ukiuni arlalinni ingerlanneqartuni atorunnaarsitsinissamut suliniutissanik suliaqartoqarsimanissaa. Aningaasanut inatsimmit VEK-mut aningaasaliissutit ukiumi ataatsimi atuuttussaanerat tamatumunnga peqqutaavoq. Atorunnaarsitsinissamut suliniutissaq tassaavoq ukiunut tulliuttunut tapiissutissat atorunnaarnerini suliniutip qanoq pinissaanut nassuiaat (naatsoq)

Piffissaliussat 

Qinnuteqaatinik ukiup qanorluunniit ilinerani nassiussisinnaavusi. Qinnuteqaatit ingerlaavartumik suliarineqartarput.

Nalunaarusiaq suliamullu naatsorsuutit ukiumi tapiiffiusumi kingusinnerpaamik 31. december nassiunneqassapput.
Namminiilivinnermut, Pinngortitamut, Avatangiisinut Nunalerinermullu Naalakkersuisoqarfik
Imaneq 1A - 801
Postboks 1614
3900 Nuuk

Oqarasuaat: (+299) 34 50 00
Fax: (+299) 34 54 10
E-mail: pann@nanoq.gl
Nittartagaq: www.naalakkersuisut.gl