NunaGIS

NunaGIS 

www.nunagis.gl nunap assinginik digital-iusunik, Kalaallit Nunaanni nunap assinginik internet-ikkut saqqummersinneqarsinnaasunik toqqorsiviuvoq tamanit takuneqarsinnaavoq. Nunap assingini nunami sumiiffiit assigiinngitsut pillugit paasissutissat, soorlu kommunit killeqarfii illullu pioreersut nassaarisinnaavatit. Nunap assingi assigiinngitsunut marlunnut avitaapput:
  • Kalaallit Nunaat tamakkerlugu nunap assinga – asimi nuna ammaannartoq
  • Illoqarfiit nunaqarfiillu assingi

Asimi nuna ammaannartoq
NunaGIS-imi Kalaallit Nunaat tamakkerlugu nunap assinga nassaarisinnaavat. Nunap assinga assigiinngitsunik qaleriiagaavoq, soorlu qaqqat timmiaqarfiit, timmiaqarfiit sunnertiasut, distrikt-it aallaaniarfiusartut kiisalu illoqarfiit nunaqarfiit inissisimaffii. Nunap assingani qaleriinni ataasiakkaani paasissutissanik amerlanerusunik nassaarsinnaavutit. Assersuutigalugu distrikt-i aallaaniarfiusartoq saqqummersikkukku, sumiiffimmi tassanerpiaq maleruagassat piffissallu aallaaniarfiusut pillugit paasissutissanik amerlanerusunik nassaarsinnaavutit.


Illoqarfiit nunaqarfiillu
Aamma nunami illoqarfiit nunaqarfiillu assingi eqqoqqissaartut silaannarmiillu assilisat nassaarisinnaavatit. Tassani assersuutigalugu kommunini pilersaarutit atuuttut, illut eriagisassat nunaminertallu atorneqanngitsut takusinnaavatit.


Nunaminertanik atugassiisarneq
NunaGIS aqqutigalugu soorlu illuliorniarlutit, illuaraliorniarlutit illumilluunniit allamik sananiarlutit nunaminertamik atugassinneqarnissamut www.nunagis.gl aqqutigalugu qinnuteqarsinnaavutit. Nittartakkami nunaminertanik atugassiisarnerup ataani kommune najukkat toqqarsinnaavat. Kommune najukkat toqqarukku nunaminertanut qinnuteqarfissamut elektronisk-iusumut nuutsinneqassaatit. Tassani immersugassaq immersoreerukku naqissinnaavat, taannalu najukkanni innuttaasunut sullissivimmut nunaqarfimmiluunniit allaffimmut tunniutissavat.


Aaqqissuussaaneq
Ineqarnermut, Pinngortitamut Avatangiisinullu Naalakkersuisoqarfik NunaGIS-imut pingaarnertut akisussaasuuvoq. Nuna GIS-ip ingerlanneqarnera ASIAQ-mit – Kalaallit Nunaanni Misissueqqaarnernit – isumagineqarpoq. Namminersorlutik Oqartussani Naalakkersuisoqarfiit taakkulu ataanni suliffeqarfiit, kiisalu kommunit NunaGIS-imi suliassaqarfigisamik iluanni paasissutissiisarput.


Takorluukkat
NunaGIS internet aqqutigalugu nunami sumiiffinnut paasissutissanut ataatsimut isaarianngortinneqarnissaa takorloorneqarpoq. Tassalu siunissami nunami sumiiffiit pillugit paasissutissat tamanit takuneqarsinnaasut tamaasa tassunga toqqaannartumik iserlutit nassaarisinnaalissavatit. Aamma assersuutigalugu kisitsisitigut paasissutissat – peqqissuseq, suliffissaaleqineq il.il. pillugit kisitsisit – NunaGIS aqqutigalugu saqqummersinneqartarnissaat takorloorneqarpoq. Aamma taamaalluni inuit najugaat ujarneqarsinnaalissapput, tassanilu najugaq illoqarfiup assingatigut takuneqarsinnaalissaaq.
Namminiilivinnermut, Pinngortitamut, Avatangiisinut Nunalerinermullu Naalakkersuisoqarfik
Imaneq 1A - 801
Postboks 1614
3900 Nuuk

Oqarasuaat: (+299) 34 50 00
Fax: (+299) 34 54 10
E-mail: pann@nanoq.gl
Nittartagaq: www.naalakkersuisut.gl