Meeqqat inuusuttullu ikiortariallit – Iliuusissanik pilersaarutit

Meeqqat inuusuttullu ikiortariallit – Iliuusissanik pilersaarutit 

Meeqqap inuusuttulluunniit inuttut atugai aamma ineriartornera ulorianartorsiortinneqartoq pillugu kommune nalunaarfigineqaruni imaluunniit nammineq ilisimasaqaleruni, meeraq, inuusuttoq ilaqutariilluunniit misissuiffiginissaannut kommune pisussaavoq. Misissuineq aallaavigalugu sulianik suliarinnittartoq, sapinngisamik angajoqqaat inuusuttorlu peqatigalugit iliuusissatut pilersaarummik suliaqartussaavoq.

Iliuusissatut pilersaarummi nassuiarneqarsimassapput pissutsit arlallit assigiinngitsut, assersuutigalugu:

  • Ilaqutariit kikkuuppat?
  • Ilaqutariit sumi qanorlu najugaqarpat?
  • Ilaqutaasut ataasiakkaat sulerisarpat? Suliffik, suliffeqanngitsoq, atuartoq, sunngiffik
  • Ilaqutariit nukittuffii sanngiiffiilu suunuku?
  • Ilaqutariit ikiorneqarnissamik pisariaqartitsippat – ikiuineq qanoq ittoq pisariaqartippaat?
  • Ikiorsiineq qaqugu qanorlu aallartinneqassava?


Meeqqap inuusuttulluunniit ikiorsiineq ukiuminut naleqquttumik nalinginnaasumik ineriartornissamut pisariaqartitaa, iliuusissatut pilersaarutip qularnaassavaa. Taamaalilluni assersuutigalugu meeqqamut tunngatillugu ulloq unnuarlu paaqqinnittarfiup aamma angajoqqaarsiaagallartut perorsaanerminni suut suliassarineraat iliuusissatut pilersaarutip imarisarpaa.

Tamakku saniatigut sulianik suliarinnittartup ilaqutaasullu akornanni iliuusissatut pilersaarut attaveqaatitut atuuffeqarpoq, ukiullu tamaasa imaluunniit kommunalbestyrelse-p pisariaqartitsinera malillugu nalilersoqqinneqartassalluni.

Iliuusissatut pilersaarutip meeraq malittarissavaa.

Oqartussaasoqarfiit assigiinngitsunik suliallit suleqatigiiffianut iliuusissatut pilersaarut sulianik suliarinnittup nassiutissavaa, taassumalu ikiorsiinerit suut meeqqap imaluunniit inuusuttup ilaqutaasullu pissarsiarisinnaassaneraat nalilersussallugu. Oqartussaasoqarfiit assigiinngitsunik suliallit suleqatigiiffiata nalilersuinini Inunnik Isumaginninnermut Ataatsimiititaliamut nalilersugassanngorlugu nassiutissavaa, taannalu aalajangiissaaq, ajornanngippat meeraq imaluunniit inuusuttoq ilaqutaasullu peqatigalugit, ikiorsiineq qanoq ittoq meeqqap, inuusuttup ilaqutaasulluunniit pissarsiarissaneraat.

Ikiorsiineq ima iluseqarsinnaavoq assersuutigalugu:

  • Ulluunerani neqeroorut: Ulluunerani paaqqinnittarfimmi inissamik akeqanngitsumik inissaqartitaaneq, immikkut ittumik atuartitaaneq imaluunniit perorsaanermik ilinniarfimmi ilinniarneq
  • Angerlarsimaffimmi tapersersorti: Assersuutigalugu ilaqutariinnut siunnersorti, angerlarsimaffimmi ikiortit imaluunniit perorsaasoq ikiorti
  • Oqilisaassineq: Piffissami sivikinnerusumi sivisunerusumilluunniit angajoqqaarsiaagallartuni najugaqarneq
  • Efterskole-rnermut, atisanut aamma kaasarfimmiussanut aningaasatigut ikiorserneqarneq
  • Inissinneqarneq: Illit akuersiseqqaarlutit akuersiseqqaarnallunniit illit meeqqat angerlarsimaffiup avataanut inissinneqassasoq Isumaginninnermut Ataatsimiititaliap aalajangersinnaavaa


Malugiuk
Illit meeqqat pillugu iliuusissatut pilersaarutit aalajangiinerillu suliarineqarsimasut allaganngorlugit nuutinneri pissarsiarissallugit angajoqqaatut sukkulluunniit pisinnaatitaaffeqarputit.


Naammagittaalliuuteqarneq
Iliuusissatut pilersaarut illit meeqqat imaluunniit inuusuttuaraatit pillugu aalajangiinerit isumaqatiginngikkukkit, Isumaginninnermi Naammagittaalliuteqartarfimmut naammagittaalliuteqarnissamut pisinnaatitaaffeqarputit. Allaaserisat attuumassutillit ataanni Isumaginninnermi Naammagittaalliuteqartarfimmut qanoq naammagittaalliuteqassanersutit atuarsinnaavat.

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl

Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl