Meeqqat inuusuttullu ikiortariallit – Angajoqqaarsianngorit

Meeqqat inuusuttullu ikiortariallit – Angajoqqaarsianngorit 

Inuit angajoqqaarsiaagallartut tassaapput, piffissami ilaqutariinnik inuuniarnikkut ajornartorsiutilinnik, eqqarsartaatsikkut nappaatilinnik imaluunniit timikkut ajornartorsiuteqartunik ikiuisartut, taamaaliortarput meeqqamik imaluunniit ilaqutariit meerartaannik sivikinnerusumi sivisunerusumiluunniit najugaqartitsinermikkut. Angajoqqaarsiaagallartunnngornissat soqutigigukku, najukkanni innuttaasunik sullissivik attavigissavat.


Piumasaqaatit
Angajoqqaarsiaagallartunngorumaguit makku eqquutsissavatit

  • ilaqutariit meerartaannik ajornartorsiuteqartunik ikiuinissamut eqqarsartaatsikkut nukissaqarneq
  • meerarsiarisavit ilinniitinnissaanut ineqarnikkut inissaqartitsineq
  • kommunimut qinnuteqaammik nassiussineq
  • pinerlussimanermi allagartamik takussutissiineq
  • peqqissuseq pillugu allagartamik takutitsineq, qaammatinut pingasunut kingullernut tunngasoq
  • peqqissuuneq atornerluinermillu ajornartorsiuteqannginneq
  • nammineerluni meeqqat angerlarsimaffiup avataanut inissinneqarsimannginnerat


Taakku saniatigut kommunip nalilissavaa, illit ilaquttatit piginnaasaqarnersut makkuninnga isumaginninnissamut:

  1. Meeqqamik perorsaasinnaaneq aamma paaqqutarinnissinnaaneq
  2. Meeqqamut attaveqarnermik pilersitsineq, qanilaarneq, kialaartumik misigissuseqarneq, asanninnermik misigissuseqarneq, ataavarneq aamma meeqqap aalajangeeqataasinnaaneranik ataqqinninneq aallaavigalugit
  3. Meeqqap taassumalu ilaqutaasa attaveqarfigeqatigiinnerannik ataqqinninneq tapersersuinerlu
  4. Inuuneq naallugu akuunissamut pisussaaffilerneq
  5. Akuulluinnarluni inuit suleqatigiit pimoorussisut peqataaffigalugit


Piumasaqaatit atorneqartut tallimat siuliini taaneqartut, aaqqissuussinermut qallunaatut taaguuteqartumut RUGO-mut, kalaallisut pissarsiorneq, ilinniartitsineq, akuersineq aamma aaqqissuussaaneq-mik nutserneqarsinnaasumut ilaapput, taakkulu meerarsiaasut angajoqqaarsiaminniinnerminni pitsaasunik toqqissisimasunillu atugaqarnissaat qulakkeertussaavaat.

Angajoqqaarsiaagallartut angerlarsimaffigisaallu kommunimit akuersissutigineqartarput. Tamanna ilaatigut oqaloqateqarnikkut aamma angerlarsimaffimmut pulaarnikkut ingerlanneqartarpoq.

Angajoqqaarsiaagallartartut assigiinngitsut pissarsiarineqarsinnaapput:


Nalinginnaasumik angajoqqaarsiaagallartut

  • Meerarsianut ataasiakkaanut tamanut akuersissummik allaganngukkamik peqassaatit
  • Paarsininnut isumaqatigiissummik peqassaatit, taassuma imarissavaa angajoqqaarsiaagallartut kommunillu akornanni isumaqatigiissut
  • Meerarsiat ilinni aalajangersimasumik najugaqarpat, saniatigut suliffeqarsinnaavutit
  • Meerarsiamut ilaqutaanullu iliuusissatut pilersaarutip kommunip suliarinikuusaata pissarsiarinissaa pisinnaatitaaffigaat
  • Meeqqamut ataatsimut paarsinermi ajunngitsorsiaqarnissannut, piffissami matumani qaammammut 4.123 kr.-iusumik pisartagaqarnissamut pisinnaatitaaffeqarputit. Paarsinermi ajunngitsorsiat, marloriaatinngortinneqassagunik akileraaruteqaataasussaapput


Inuussutissarsiutigalugu angajoqqaarsiaagallartut

  • Meerarsianut ataasiakkaanut tamanut akuersissummik allaganngukkamik peqassaatit
  • Paarsininnut isumaqatigiissummik peqassaatit, taassuma imarissavaa angajoqqaarsiaagallartut kommunillu akornanni isumaqatigiissut
  • Angajoqqaarsiaagallartup aappaa inunnik isumaginninnissamut ilinniagaqarnermik tunuliaqutaqassaaq, assersuutigalugu inunnik aamma peqqinnissakkut ikiuisartoq, perorsaasoq ilinniartitsisorluunniit
  • Angajoqqaarsiaagallartoq inunnik isumaginninnermik ilinniagaqarsimasoq, aallaavittut isigalugu meerarsiat najugaqartinnerisa nalaanni angerlarsimaffimmiittartussaavoq
  • Meerarsiamut ilaqutaanullu iliuusissatut pilersaarutip kommunip suliarinikuusaata pissarsiarinissaa pisinnaatitaaffigaat
  • Meerarsiap angerlartinneqarnissaa pillugu kommunip aalajangiinera isumaqatiginngikkukku, Meeqqat pillugit Paasisimasalittut Qitiusumik Ataatsimiititaliamut, boks 260, 3900 Nuuk, suliassaq suliassanngortissallugu pisinnaatitaaffeqarputit
  • PIP-ip isumaqatigiissutaa naapertorlugu akissarsiaqassaatit


Nammineq aaqqissuussamik angajoqqaarsiaagallarneq

  • Meeqqat ilinnit paarineqarnissaat nammineerlutit isumaqatigiissusiorfigisinnaavat
  • Piffissaq qaammatinik pingasunik sivisuneruppat, paarsinissamut akuersissummik pissaatit, taannalu paarsinissamut akuerineqarumaguit angajoqqaarsiaagallartunut allanut piumasaqaatit assigalugit immersorneqassaaq
  • Nammineq aaqqissuussamik angajoqqaarsiaqartitsigallarnermut kommune aningaasaqarnikkut ikiorsiissutinik tunniussineq ajorpoq


Tassanngaannartumik angajoqqaarsiaagallarneq

  • Meerarsianut ataasiakkaanut tamanut akuersissummik allaganngukkamik peqassaatit
  • Ullup unnuallu ingerlanerani piffissap qanoq ilinera apeqqutaatinnagu tassanngaannartumik pisuni meeqqanik tigusinissamut piumassuseqassaatit
  • Meeqqamik paarsinermi ajunngitsorsiaqarnissamut pisinnaatitaaffeqarputit, ulloq unnuarlu meeqqamut ataatsimut 330 kr.-iusumik


Ilaqutariit oqilisaassisartut

  • Meerarsianut ataasiakkaanut tamanut akuersissummik allaganngukkamik peqassaatit
  • Meerarsiaq piffissami sivikitsumi ilinni najugaqassaaq, assersuutigalugu sapaatit akunnerisa naaneri allortarlugit, sunngiffeqarnermi imaluunniit sapaatip akunnera allortarlugu
  • Meeqqamik paarsinermi ajunngitsorsiaqarnissamut pisinnaatitaaffeqarputit, ulloq unnuarlu meeqqamut ataatsimut 284 kr.-isunik


Malugiuk
Pissutsit ilinni imaluunniit ilissinni atukkasi allannguuteqarpata, paarsinissamut akuersissutit sukkulluunniit kommunip atorunnaarsissinnaavai.

Quppersagaaqqami ataaniittumi angajoqqaarsiaanermut tunngasumik annertunerusumik paasisaqarsinnaavutit.

Attaveqarneq aamma Attaveqarnermik ajornartorsiuteqarneq 

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl

Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl