Meeqqat inuusuttullu ikiortariallit – Inissiineq

Meeqqat inuusuttullu ikiortariallit – Inissiineq 

Inissiineq tassaavoq, meeqqat inuusuttulluunniit angerlarsimaffimminnit nuutsinneqarnerat. Meeraq inuusuttorluunniit angajoqqaarsianut imaluunniit ulloq unnuarlu paaqqinnittarfimmut inissinneqarsinnaavoq. Meeqqap ilaqutaaniit meeqqamik inissiineq akulerunneruvoq annertooq, kommunilu aatsaat meeqqamik inissiisinnaavoq, meeqqamut tunngatillugu ajornartorsiutit ilaqutariit iluanni aaqqiivigineqarsinnaanngitsutut kommunimit nalilerneqarpata.


Piumasaqaatit
Kommunip meeraq imaluunniit inuusuttoq angerlarsimaffiup avataanut inississinnaavaa, meeqqap peqqissusaa imaluunniit ineriartornerata akornusernissaa aarlerinaateqarpat. Tamanna ilaatigut pisinnaavoq, imaattoqarpat:

  • Angajoqqaat meeraq naammaginartumik paaqqutarinngippassuk imaluunniit meeqqap ineriartornera tapersersunngippassuk
  • Meeraq persuttarneqarsimappat imaluunniit kinguaassiutitigut atornerlunneqarsimappat
  • Meeraq pinerlussimappat, atornerluinermik ajornartorsiuteqarpat imaluunniit inuit akornanniinnermi sakkortuunik ajornartorsiuteqarpat
  • Meeraq pissusilersortarnermigut imaluunniit naleqqussarnissamut sakkortuunik ajornartorsiuteqarpat


Paasissutissat
Angajoqqaatut oqartussaassuseqartumik akuersisitsinikkut aamma akuersisitseqqaarnani kommune meeqqamik inissiisinnaavoq.

Kommunip aalajangertussaavaa

  • meeraq sumi inissinneqassanersoq
  • meeraq illoqarfimmut allamut nuussanersoq
  • meeqqap qanoq sivisutigisumik qanorlu ilusilimmik ilaquttani ilagisinnaanerai


Taakku saniatigut angajoqqaat aningaasaqarnerat kommunip nalilersussavaa aamma inissiineq tamakkiisumik ilaannakuusumilluunniit ilaqutariit akilissaneraat aalajangiilluni.

Meeqqap inissinneqarnissaa sioqqullugu iliuusissatut pilersaarut suliarineqassaaq. Tassanngaannartumik meeraq inissinneqarpat, meeqqap inissinneqarnerata kingorna kingusinnerpaamik ullut 14-it qaangiutinnginneranni iliuusissatut pilersaarut suliarineqassaaq.


Inissiisoqaqqanerani
Meeqqamik inissiineq ingerlagallartillugu, paaqqinnittarfimmik imaluunniit angajoqqaarsiaagallartunik ikinnerpaamik ukiumut ataasiarluni kommune nakkutilliinermik ingerlatsisussaavoq. Tamatuma kingunerivaa, inissiinerup ikinnerpaamik ukiumut ataasiarluni nalilersoqqinneqartarnera.

Angerlarsimaffiup avataanut meeraq inissinneqarsimatilluni, angajoqqaaminut attaveqarnerminik attassiinnarnissamut aamma ilaginninnissamut pisinnaatitaaffeqarpoq. Taamaammat kommune, angajoqqaat aamma inissinneqarfiusoq peqatigiillutik meeqqap angajoqqaallu ilagiinnissaat aaqqissuuttassavaat. Meeqqap pisariaqartitai aallaavigalugit ilagiinnissaq pingaarnertut aaqqissuunneqassaaq. Inissiineq angajoqqaat akuersiseqqaarnagit pisimappat, ilagiinnissamut tunngatillugu aalajangiineq kommunip kisimiilluni aalajangersinnaavaa. Pisuni taamak ittuni, meeqqap mianerinissaa eqqarsaatigalugu ilagiinnissaq malinnaavigineqassasoq kommunip aamma toqqarsinnaavaa.


Angerlartitsineq
Ajornartorsiutit meeqqat angerlarsimaffiup avataanut inissinneqarneranut aallaaviusut, angerlarsimaffiup iluani aaqqinneqarsinnaaleqqippata, meeraq angerlartinneqassaaq.

Meeqqap inuusuttulluunniit angerlartinneqarsinnaanera sioqqullugu, meeqqamut inuusuttumulluunniit angerlartitsineq pitsaanerpaassanersoq pillugu angajoqqaarsiaagallartut imaluunniit ulloq unnuarlu paaqqinnittarfik nalilersuissapput. Angerlartitsinissaq pillugu aalajangiinermini, angajoqqaarsiaagallartut imaluunniit ulloq unnuarlu paaqqinnittarfiup nalilersuinerat kommunip ilaatissinnaavaa.


Malugiuk
Angajoqqaat akuersiteqqaanngikkaluarlugit meeqqap angerlarsimaffiup avataanut inissinneqarnissaa Inunnik Isumaginninnermut Ataatsimiititaliap isumaliutigippagu, angajoqqaat aamma meeqqat 15-it sinnerlugit ukiullit, illersuisup inissiineq pillugu oqaaseqarnissaat kommunip neqeroorutigissavaa. Angajoqqaat meerarlu inuttut siunnersuisoqarnissamut pisinnaatitaaffeqarput, suliap ingerlaqqinnerani tapersersuisinnaasumik.

Illit meeqqannik pinngitsaaliissummik peersitsinissaq pillugu kommunip aalajangiinera pillugu angajoqqaatut naammagittaalliuuteqarsinnaavutit. Meeqqap angerlartinneqannginnissaa pillugu aalajangiineq pillugu aamma naammagittaalliuuteqarsinnaavutit.

Allaaserisat attuumassutillit

Kommune Kujalleq
Postboks 514
3920 Qaqortoq
Oqarasuaat: 704 100
Fax.: 704 177
E-mail: kommune@kujalleq.gl
http://www.kujalleq.gl

Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iniian@nanoq.gl
Nittartagaq: www.naalakkersuisut.gl