Ilisimatusarfimmut qinnuteqarit

Ilisimatusarfimmut maana qinnuteqarit

Nalinginnaasumik paasissutissiineq 

Ilisimatusarfik tassaavoq Kalaallit Nunaanni kisiartaalluni ilisimatusarfik ilinniartitaanerillu assigiinngitsut qulit neqeroorutigai bacheloritut kandidatitullu qaffasissuseqartut.

Piumasaqaatit 

Ilinniartitaanerit tiguneqarnissamullu piumasaqaatit pillugit paasissutissat annerusumik uani www.uni.gl takusinnaavatit.

Ilinniagaqarnersiutit 

Ilisimatusarfimmut qinnuteqarneq ilutigalugu ilinniagaqarnersiuteqarnissamut qinnuteqassaatit.

Ilinniagaqarnersiutit pillugit annerusumik atuaruk.

Qinnuteqarneq 

Ilisimatusarfimmut qinnuteqarniaruit qinnuteqaatit Majoriarmut illoqarfigisamiittumut tunniutissavat imaluunniit nassiutissavat, imaluunniit nittartagaq atorlugu uani qinnuteqarsinnaavutit.

NemID’qaruit
NemID’eqaruit NemID atorlugu isersinnaavutit toqqaannartumillu sullissivik.gl-ikkut qinnuteqarlutit.

Imminut sullinneq qulaaniittoq tooruk NemID’lu atorlugu iseriarlutit aallartillutit.

Eqqaamallugu
Sullissivik.gl-ikkut Ilisimatusarfimmut qinnuteqassaguit qinnuteqarnermut uppernarsaat takussutissatut toqqussallugu pingaaruteqarpoq.

Qinnuteqarninni mail-it allakkukku uppernarsaat mail-ikkut pissarsiarissavat.

NemID’qanngikkuit
NemID’qanngikkuit qinnuteqaammik ’Kalaallit Nunaanni ilinniakkanut aamma ilinniagaqarnersiutinut qinnuteqaat immersugassaq’ aqqutigalugu aallersinnaavutit Majoriarmullu illoqarfigisamiittumut tunniullugu imaluunniit qinnuteqaat immersoreernikoq nassiullugu.

Qinnuteqaatip pappilissap immersornissaanut ilitsersuut atuaruk.

Malugiuk
Kollegiamut immikkut qinnuteqartoqassaaq www.kaf.gl aqqutigalugu, Nuummeersut kollegiamik qinnuteqassapput Majoriarmi Nuummiittumi.

Ingerlatseriaaseq 

Tigutinnissamut qinnuteqaatit Ilisimatusarfimmit suliarineqassaaq, ilinniagaqarnersiuteqarnissamullu qinnuteqaatit Ilinniagaqarnersiuteqartitsivimmit suliarineqassalluni.

15. maj nallertinnagu tigutissimanerlutit imaluunniit tigutissimannginnerlutit nalunaarfigineqassaatit.

Ilinniakkamut tigutinnissamut soraarummeernissaq suli naammassisimanngikkukku tigutinnissamut periarfissaqarpoq piumasaqaatitalerlugu, tassalu soraarummeeruit aalajangersimasumik angusaqarsimanissaq.

Eqqaamallugu soraarummeersimanermut uppernarsaat nassiunneqassammat kingusinnerpaamik ulloq 30. juni.

Maj qaammat ilinniarnissap aallartinnissaa, ilinniagaqarnersiutit il.il. pillugit annerusumik Ilisimatusarfimmit paasitinneqassaatit.

Allannguineq 

Qinnuteqaatinni allanngortitassaqaruit imalt. ilassutissaqaruit illoqarfinni Majoriaq saaffigissavat qinnuteqarfissap marsip 1-ani qaangiunnissaata tungaanut. Marsip 1-ata kingorna Ilisimatusarfik toqqaannartumik attavigissavat ugguuna: studieadm@uni.gl, qinnuteqaatit taamaatiinnarniarukku imalt. ilassutissaqartikkukku allanngortitassaqaruilluunniit.
 

Piffissaliussat 

Kingusinnerpaamik qinnuteqarnissamut piffissaliussaq tassaavoq ulloq 1. marts.

Eqqaamallugu soraarummeersimanermut uppernarsaat tamakkiisoq nassiunneqassammat kingusinnerpaamik ulloq 29. juni.

Maalaarut 

Ilisimatusarfiup tigutinnissamut aalajangiinera pillugu isumaqaruit maleruagassanik unioqqutitsisimasoq maalaarnissamut pisinnaatitaaffeqarputit. Maalaarut allaganngorlugu nassiunneqassaaq ilinniartut allaffeqarfiannut: studieadm@uni.gl. Maalaarut tunngavilersorneqassaaq tunniunneqassallunilu kingusinnerpaamik aalajangiinerup nalunaarutigineqarneraniit sapaatit akunneri sisamat qaangiutsinnagit.
Majoriaq
Ilinniartitaanermut, Kultureqarnermut Ilisimatusarnermut Ilageeqarnermullu Naalakkersuisoqarfik
Imaneq 4
Postboks 1029
3900 Nuuk

Oqarasuaat: (+299) 34 50 00
E-mail: ikiin@nanoq.gl
Nittartagaq: www.naalakkersuisut.gl