Nalinginnaasumik paasissutissiineq 

Inuussutissarsiornermut PhD tassaavoq inuussutissarsiornermut sammisumik ilisimatusarnikkut suliniut aamma PhD-mik ilinniartitaanerusoq. Suliniut suliffeqarfimmik namminersortumik suleqateqarnikkut Inuussutissarsiornermut PhD-iinngorniartup Ilisimatusarfiullu akornanni ingerlanneqassaaq. Inuussutissarsiornermut sammisumik PhD-mik ilisimatusartoq suliffeqarfimmi atorfeqassaaq tamatumalu ilutigisaanik Ilisimatusarfimmi allatsissimassalluni. Kandidatip ilinniagaqartup piffissaq suliffigisassani tamaat suliniummi ilinniarnerminilu atussavaa, suliffeqarfimmi Ilisimatusarfimmilu agguarlugu ingerlatsilluni.

Piumasaqaatit 

Ilinniagaqartoq akissarsiaqarluni suliffeqarfimmi atorfinitsinneqassaaq Inuussutissarsiornermut PhD-tut ilinniagartuunngorniarnerup nalaani tamarmiusumi, piffissarlu atukkani nalinginnaasumik suliffeqarfiup Ilisimatusarfiullu akornanni avillugu atussallugu. Ilinniagartuunngorniaq minnerpaamik ilinniagaqartutut siunnersortinit marlunnit siunnersorneqartassaaq, Ilisimatusarfimmiit ataaseq aamma suliffeqarfimmiit ataaseq. Immikkut pisoqartillugu Ilisimatusarfik inummik aalajangersimasumik Ilisimatusarfimmi atorfeqartuunngitsumik pingaarnertut siunnersortaasussamik toqqaasinnaasarpoq.

Suliffeqarfik Inuussutissarsiornermut PhD-mut ilinniagartuunngorniartup sungiusaammik suliffigisaa Kalaallit Nunaanni Inuussutissarsiortut Nalunaarsorneqarfianni nalunaarsorsimasuussaaq, suliffeqarfillu ilisimasatigut aningaasarsiornikkullu naammattumik oqimaassuseqassaaq, Inuussutissarsiornermut PhD-mi suliniutip naammassillugu ingerlanneqarsinnaaneranut isumannaarinnittumik.

Ilisimatusarfiup kalaallit, danskit nunami allamiulluunniit Ilisimatusarfiutiginissaanut piumasaqaateqanngilaq. Ilinniagarli Ilisimatusarfimmi nunami allamiittumi ingerlanneqassappat siunnersortimik kalaallit imaluunniit danskit Ilisimatusarfianniit attuumassuteqartitsisoqassaaq.

Pisortani ingerlatsiviit immikkut ittutigut qinnuteqarsinnaapput Inuussutissarsiornermut PhD-ertumik suleqateqarnissamut Ilisimatusarfimmik suleqateqarlutik, ingerlatsinissaq nalinginnaasumik Inuussutissarsiornermut PhD-nermut piumasaqaatinik naammassinnissimappat.

Ilinniagartuunngorniartumut piumasaqaatit
  • Ilinniagartuutut (kandidatniveau) ilinniakkamik naammassinnissimassaaq
  • Agguaqatigiissillugit karakteerit anguneqarsinnaasut qeqqat qaangersimassavaa
  • Ilisimasanut tunngatillugu oqaaseqaateqartitsisoqassaaq, kiisalu immikkut pineqartumut oqaaseqaatinik Ilisimatusarfimmit aamma suliffeqarfimmit peqataasumut tunniussisoqarsimassaaq

Immikkut pisoqartillugu karakteerit angusarineqarsinnaasut qeqqat qaangersimanngikkaluaraat akuersisoqarsinnaavoq, ilinniagartuup upernarsarsinnaappagu ilisimatusarnissamut piareersimaneq, assersuutigalugu ilisimatuut tusaataanni allaaserisanik saqqummiussisarsimanikkut, patentimik pissarsisimanikkut imaluunniit allatut piginnaasaqassutsimik takutitsisumik suliniuteqarsimanikkut.

Ilinniagartuunut nunami allamiusut kandidatitut naammassisimasunut aamma piumasaqaataavoq taakkua kalaallit imaluunniit danskit naammassisaattulli naammassisaqarsimassasut. Nunami allamiup kandidatip angusaanut karakterinut tunngasumik naliliineq, taakkua assigisaannut kalaallini imaluunniit danskini, Ilisimatusarfimmit innersuussisuusumit akuerineqarsimassapput. Kiisalu aamma piumasaqaataavoq ilinniagartooq pineqartoq Ilisimatusarfimmi PhD-mik ilinniagartuunngorniartutut tiguneqarsimassasoq.

Suliffeqarfimmut piumasaqaatit
  • Kalaallit suliffeqarfiutigissavaat imaluunniit ingerlatsivik / kattuffik imminut pigisoq, annertuumik nammineerluni aningaasaqarnikkut isaatitsisuusoq
  • Ilinniagaq aningaasaqarnikkut ilisimasatigullu tapersersorsinnaassavaa ukiut pingasut iluanni ingerlatsinermi
  • Minnerpaamillu ataatsimik sulisoqassalluni ilisimasatigut piginnaaneqartumik suliffeqarfimmi ilinniagartuumut siunnersortaanissaminut
  • Suliniutip suliffeqarfimmi aaqqissuussaanikkut inissisimalluarnissaa isumannaassavaa

Ilisimatusarfimmut Ilinniarfiusumut piumasaqaatit
  • Ilisimatusarfiussaaq Kalaallit Nunaanni, Danmark-imi imaluunniit nunani allani. Ilisimatusarfinnut nunani allaniittunut nunami pineqartumi oqartussaasunit akuersissummik peqassaaq, PhD-mik ilinniarnermik ingerlatsisinnaanernut
  • Minnerpaamik aalajangersimasumik atorfeqartumik ataatsimik ilimasassanik ilisimasaqartumik peqassaaq, ilitsersuisutut Inuussutissarsiornermut PhD-tut ilinniagartuunngorniartumut sulisinnaasumik
  • Suliniummi sammineqartumut tunngasumik ilisimasatigut ingerlatsiffiusumik avatangiiseqassaaq, Inuussutissarsiornermut PhD-mik ilinniagartuunngorniarnermi suliniummik tapersersuisinnaasumik. Tamanna isumaqarpoq Ilisimatusarfimmi pineqartumi arlalinnik sulisoqassasoq fagitigut suliamik ingerlatsiffiusup iluani, pisariaqalissagaluarpat ilitsersuinermik tigusisinnaasunik
  • Ilisimatusarfik nunami allamiittoq ilinniagartuunngorniarnermi pineqartumi ingerlatsiviusimappat kalaallit imaluunniit danskit Ilisimatusarfiannik attaveqarfeqartoqassaaq, Inuussutissarsiutinut PhD-mik suliniummi pingajuusumik
  • Ilisimatusarfimmi pineqartumi ilitsersuisutut Inuussutissarsiutinut PhD-mik suliniummut attaveqaataasoq ilisimatusarnermut fagitigut suliniut pillugu nalilersuinermik suliaqassaaq

Qinnuteqarnerup ingerlariaasia 

  • Suliffeqarfik Inuussutissarsiutinut PhD-mik ilinniagartuunngorniartussarlu ataatsimut aalajangiissapput kalaallit Inuussutissarsiummut PhD-mik suliniutaannik qinnuteqaateqarniarlutik
  • Inuussutissarsiornermut PhD-mik suliniummut qinnuteqaat fagitigut Ilisimatusarfimmi ingerlatsiviusussami nalilersorneqassaaq, tassanilu ilaatigut isummerfigineqassalluni Inuussutissarsiutinut PhD-mik ilinniagartuunngorniartussaq Ilisimatusarfimmi allatsissinnaanersoq
  • Ilisimatusarfimmi ilisimatusarnermik ingerlatsiviusussami fagitigut akuersissuteqartoqareerpat Inuussutissarsiutinut PhD-mik qinnuteqaat Namminersorlutik Oqartussani nalilersuisartutut ataatsimiititaliamit nalilerneqassaaq, isummerfigineqarlunilu qinnuteqaat akuerineqarsinnaanersoq
  • Ilisimatusarfimmut ilisimatusarfiusussamut qinnuteqaat nassiunneqassaaq, malittarisassallu Ilisimatusarfimmi atuuttut naapertorlugit suliarineqarluni

Aallartittoqarsinnaalertinnagu inuussutissarsiutinut PhD-mik suliniut Namminersorlutik Oqartussat nalilersuisartutut ataatsimiititaliaanni aammalu Ilisimatusarfimmi ilisimatusarnermik ingerlatsiviusussami fagitigut akuerineqassaaq.

Atsiornerit Ullullu

Piffissaliuussat 

Qinnuteqarnissamut piffissaliussisarneq ingerlaavartumik pisarpoq, saqqummiunneqartarlunilu Namminersorlutik Oqartussat quppersagaanni www.naalakkersuisut.gl Inuussutissarsiornermut, Kultureqarnermut, Ilisimatusarnermut Ilageeqarnermullu Naalakkersuisoqarfiup ataani.
Qinnuteqaat Naalakkersuisoqarfimmut kingusinnerpaamik tunniunneqareersimassaaq ulloq qinnuteqarfiusoq nal. 12.00.

2016’imi qinnuteqartoqarsinnaanngilaq.
Majoriaq
Ilinniartitaanermut, Kultureqarnermut Ilisimatusarnermut Ilageeqarnermullu Naalakkersuisoqarfik
Imaneq 4
Postboks 1029
3900 Nuuk

Oqarasuaat: (+299) 34 50 00
E-mail: ikiin@nanoq.gl
Nittartagaq: www.naalakkersuisut.gl